مسار بسكليتات طوييييييل

🚲 مسار بسكليتات عفوي في حيفا | يوم كيبور

مسار طويل بالشوارع الفاضية، مع هواء حيفا وإطلالات البحر

رح نطلع من حيفا ونمشي على امتنداد المدينة، ونستمتع بالشوارع الهادية والخالية من السيارات.

المسار حوالي 20–35 كم، وفيه تحدّي وطلعات، فمهم تكونوا مرتاحين بالركوب وقادرين تقطعوا هالمسافة.

بسبب طبيعة اليوم، المسار رح يكون عفوي.. ونمشي قد ما منقدر.. رح نحاول نرتّب الطلعات واللقاءات بين المشاركين، بس للتوضيح: مش رح نكون كلنا مع بعض طول الوقت، ورح نلتقي ببعض خلال المسار.

لمين مناسب المسار؟

📌 كل شخص عنده خبرة بالركوب على الدراجة وقادر يقطع 20–35 كم.

📌 رح يكون في استراحات ووقفات خلال الطريق.

📌 أي شخص بحس إنه تعب أو مش قادر يكمل، بقدر يوقف ويرجع على مسؤوليته.

شو لازم تجيبوا معكم؟

📌 قنينة مي سهلة الوصول، ويفضّل تكون على الدراجة.

📌 أكل خفيف للطريق.

📌 كفوف تدريب، إذا بتحبوا.

📌 بنطلون مريح ومش واسع عند كعب الرجل، عشان ما يعلق بالدواسات.

📌 حذاء مريح، ويفضّل يكون النعل خشن شوي ومش أملس، عشان ما تزحلق الرجل عن الدعاسة.

استئجار بسكليت

لكل شخص عنده بسكليت، الدفع فقط لرسوم الاشتراك.

وللي ما عنده بسكليت، رتبنا مع بشار إمكانية استئجار بسكليت منه قبل بيوم، بمبلغ 100 شاقل.. وترجيعه باليوم التالي:

📌 كل شخص بستأجر بسكليت مسؤول عن إرجاعه بنفس الحالة اللي استلمه فيها.

📌 لازم تتركوا بطاقة هوية عند بشار حتى إرجاع البسكليت.

عدد المشاركين

مجموعة صغيرة، حتى 10 أشخاص فقط.

سجّلوا بسرعة عشان نقدر نرتّب المسار واللقاءات بينكم.

مهم: كل شخص مشترك مسؤول عن حالته الصحية، لياقته، قدرته على الركوب، وسلامته الشخصية. دورنا هو ترتيب المسار والتنسيق بين المشاركين، وليس مرافقة كل شخص أو تقديم إشراف طبي على الطريق.